الشاعر علي المساح .. غصن الرياض

اغنية: غصن الرياض المايد
 كلمات: الشاعر علي المساح
......................................
يا غصن الرياض المايد
يا الناحِلني هجرك وانت ناضر وزايد
تهجرني ليه.. وأنا ليك رايد؟
 
يا غصن الرياض المايد
ما أظن عن غرامك لو أموت ما حايد
سهران ليلي طال و العين صِحت ما قايد
تعبان قصدي ليمك، وإنت ناضر وزايد
 
يا الهاجر جفيتني بنظرة لي ماك عايد
شوفتك زي هلال العيد، وفيهو بعايد
 
أنا و حبك ترعرعنا ونشأنا ندايد
من زمنا قِبيل، أيام قُلال وعدايد
ما خلِص القديم، و تبين مصايبو جدايد
حِن يا حبيب .. كفاي مُر العذاب وشدايد
 
يا خُلاصة الحواري الـمن جِنان وخوالد
حُسنك ليك يدوم، لا أم تلِد لا والد
راسخ في ظلال مجدو التليد التالد
يا الـلابس العفاف حلية وعقود وقلايد
 
عانيت في ليالي هواك ظروف واحايد
مشكلة بين هواي وجفاك وإنت محايد
بس ما ذنبي غير صغت النشيد ونشايد
في مدحك بنيت قصر الرشيد الشايد
 
أنا وحبك ترعرعنا ونشانا ندايد
من زمنا قبيل ما أيام قلال وعدايد
ما خلص القديم، تبين مصايبو جدايد
حن يا حبيب كفاي مر العذاب وشدايد