عثمان خالد .. مدينتي بارا

مدينتي {بارا}
الشاعر عثمان خالد
:: ::
بشوف قبال تشيلني الفرحه ترحل بي لعمراً فات
بشوف يا بلدي أحكي هواك واقول يا بارا فيك ابيات
اعطر كل فاصله انيقه من الفرحه بالدمعات
واخط .. يا أغلى من العافيه .. من صادق وفاي صفحات
كان اقدر اسدد دين وطن غالي وديار غاليات
واجيك في العيد أتوق للطيبه لامن تعكسه البسمات
اجيك واحضاني شوق وقاد يحن لضلوعك الحانيات
بحبك .. وانت اصلك حب عميق ما بتوصفه الكلمات
دا حب عمراً طويل واهباه .. ماحب يوم ولا ساعات
* * *
احبك في الصباح بيرش عليك النور صفا وزينات
احبك في الضحى الوقاد شموسه عليك حنت هامات
احبك في المسا الفنان ظلاله تراقص ( اللبخات )
احبك في السواقي الدايره والدوبيت نغم وصلات
احبك في الخضار وروايحه لما تداعبه النسمات
احبك في الرمال وامواجه لما ادوب هناك ذرات
احبك لما لون القمره ساهر في سماك وبات
احبك لما توب الليل يبعثر فيك نجوم تايهات
واحبك في العيون الشايله طيبة الدنيا في النظرات
واحبك في الضفايرالشاربه لون ليلات طوال ناعمات
واحبك في الشفايف الراعشه نديانات ومكتنزات
واحبك في فريق القوز ملاحن من عيون واسعات
واحبك رقصه من جيد حلوه لما تموسق الحفلات
واحبك في فريق معروف اصيل دايب على وجنات
واحبك لما يهل العيد عليك بالبهجه والفرحات
واشوف ( سوسن ) عليها الطرحه في وسط الصغارجايات
واسمع صوت حبيب لي قلبي صوت الذكر والنوبات
واحبك لما عمي ( كدومه ) يغرق في بحور غايبات
واحبك لما صوت (( أمامه )) يفرح بي يزيد عبرات
واحبك دمعه صادقه حزينه يوم قالو ( النعيسان ) مات
دا كان فنان بعيش الدنيا بينه وبينكم انتو صلات
عليه الرحمه في كل لحظه ترفعوا فيها كف دعوات
* * *
حنانيا قلبي زيد تحنان ويا عيون اسكبي دمعات
ويا شوق وا شقاكا معاي وزيد يا صدري في الآهات
ويا ديار امي فيك تحناني مزروع من زمان شتلات
وجيت بي شعري ارعى سقايته واهديك يا ديار باقات
::: :::