عثمان صالح .. تتخاصم

نتخاصم ؟

كلمات : عثمان خالد

::::::::::::::::

نتخاصم ؟
نعيش يا غالي .. لا كلمات .. ولا لقيا ؟
منو البيقدر بدون عينكا
يبسم للحياه ويحيا ؟
* * *
نتخاصم ؟
تضيع الفرحة من اعماقنا
تتبدل .. بكا .. وحرمان !
تتغرب .. تتوه الفرحه
ترحل من مكان لمكان !
زمان ما كانت الكلمات
جداول ريد .. شتل تحنان
ولا بنعيش فراق يا غالي
لا بنضوق في يوم احزان
* * *
زمان ما كان عمر ريدتنا
ما بعرف فراق لا خصام
زمان ما الفرحه راشه دروبنا
ساقيه قلوبنا ريد ووئام
زمان ما شوقنا كان بسبقنا
ينسج لينا عش احلام
يمرجحنا بنغم .. يفرحنا
يغسل مننا الآلام
دا كله يضيع ونتخاصم ؟
نعيش لا كلمه .. لا لقيا ؟
منو البقدر بدون عينيكا
يبسم للحياه ويحيا !
* * *
نتخاصم ؟
تخلي قليبي كل ما لحظه
يطرى الماضى .. يتنهد !
وتبكي دموعي .. كل ما دمعه
تهتف ليكا تتودد !
تضيع البسمه ؟
وا ... تعذيبي
بي جفنّا ً وراك مجهد
ووا .. ضيعة غنايا ولحني
لامن اطرى سيرة الود
* * *
زمان ما كنت يوم القاكا
بتبلل دموعي الخد
اناهد .. أبكي من الفرحه
ياما كنت بيك أسعد
واحب بي حبك الدنيا
وما بحمل فراق عينيك
وما بقدر بدون نظراته
ابسم للحياه وأحيا
* * *
عشان الحب عشان ريدتنا
ماداير عليك اعتب
رضيت احمل سهاد الفرقه
لو هان ليكا اتعذب
زمان ما كنت يوم القاكا
بتلاشى واذوب في الحب
ولما تلوح .. تغني الدنيا
تغرق في بحور الحب
وحتى دروبنا بيك تخضرّ
ويجن المسا ويسكب
منو الكان لحت يوم بي دربه
ما بهتز .. وما بطرب ؟
منو الماببكي من الفرحه
أو باللهفه .. يتعذب ؟
منو الما كان بقول في سره
يا حافظ الجمال .. يارب !
* * *
نتخاصم ؟
بعد ما فرحت بيكا وتهت
في آفاق خيال ووهم
وشلتك غنوه في اعماقي
واشراقات وأحلى حلم
وغنيتك وداد .. ومحبه
في رعشات حنان ونغم
فيك بالغت قلت حروف
تتوه ابعاده تبني قمم
تجيني الليله تنسى الكان ؟
تبدل لي هنايا ألم ؟
والقاك يوم تمر بي دربي
لا تسألني .. لا تسلم ؟
ولا ترميني حتى بنظره
تعكس دهشه اللقيا ؟
حرام يا غالي .. وحياة حبي
بعدك مسخت الدنيا
وصعبان لي فراق عينيك
وما بقدر بدون نظراته
ابسم للحياه واحيا