عثمان خالد .. دعوة شوق

دعوة شوق
الشاعر الأستاذ/ عثمان خالد
::::::::::::::::::::::::::
أقابلك كيف ؟
واسالمك كيف ؟
بدمعة فرحة ولاّ عناق ؟
مدغدغني الحنين للقاك
وبتعذبني ليك أشواق
* * *
اجيك يا غالي في اعماقي
شوق تواق اليك لهفان
اجيك يا اصبا من النور
وانضر من ربيع نشوان
والذ من الحلم واللهفه
ساعات اللقا الوسنان
اجيك اشواق ودعوة ريد
حروفه تذوب من التحنان
يبث فيها الفرح والشوق
جمال مُلهِم .. وذوق فنان
* * *
اجيك يا غالي شوق غرقان
في ابحر ريده . . يتودد
اجيك يا مرفأ الفيروز
أكان تقبلي اتمدد
ألم أنفاس وأطوي شراع
عشان أرتاح وبيك أسعد
واحب بي حبك الدنيا
تعال ضوقني طعم العمر
وعلم قلبي كيف يحيا
* * *
اجيك لو ترضى تروي حروفي
كان تسقيها أحلى نغم
ترش فيها الفرح والبهجه
تنسج ليها عش وقمم
وشان يبقى الحرف مسحور
تنمقه بي غلالة نور
يشيله مع الصباح عصفور
يغرق بيها كوننا نِعم
عشان تقدر حروفي الحانيه
بي زولا جميل تحلم
يعلمني الحنان بعيونه
كيف اشتاق وكيف ابسم
وكيف اكتب شعر في عيون
وكيف بي نظره بس ارسم
اجيك يا غالي .. عمر حزين
عشان تديه ليا طعم
* * *
اجيك كان ترضى تتوسد
معايا وسادة الكلمات
نذوب في همسه في انفاس
ويملانا الفرح .. رعشات
تشيلني معاك اراجيح ريد
والحان لي غيوم واعدات
لكون مسحور بنظرة عين
ومشدوه بي ندى الوجنات
نعيش ما بين غروب سكران
بسحر اللفته .. والخطوات
واعيشك دنيا من افراح
تردد اسمك .. الخفقات
والملم ليك حروف اشواقي
من فرحة نجوم تايهات
وتبقى النسمة ضوعة طيب
ونور الشمس .. في البسمات
وليل أشواقي في كتفيك
مبعثر فيها شلالات
ومن الفرحة بيك والرعشة
من انفاسك الدافئات
يشيلني نغم يقول : يا قيس
واغنيه واقول نعمات