عبدالرحمن الريح .. لي في المسالمه غزال

........................................................................
اغنية: لى فى المسالمة غزال
كلمات والحان: عبد الرحمن الريح
غناء: الفاضل احمد
........................................................................
لي في المسالمة غزال نافر بغني عليهو
جاهل وقلبو قاسي وقلبي طائع ليهو
...
مصباح الظلام الربنا معليهو
زايد في الجمال نور الجمال جاليهو
..
لو شافو الغزال على نفرتو بواليهو
ولو شافو القمر أنوارو تخجل ليهو
...
كل من شافو قال انا بالنفس افديهو
هو غصن الرياض الزاهي في واديهو
..
أزهار الربيع مازج زهور خديهو
وجدلات الحرير ما لينه ذي ايديهو
...
لو جاه النسيم زي الفرع يتنيهو
ثمار الرطيب كذب البقول يجنيهو
..
يالنور الخدود ياذا العشوق بفنيهو
الصحا والنعاس والسحر في عينيهو
...
والدو معجنو على فطرتو مربيهو
هو الفرد الوحيد في الدنيا ما في شبيهو
..
يتجاهل علي أنا حالي ما غابيهو
سالبني في نار هواه وشال قلبي يلعب بيهو
..
و أمير الهوى وقاضى الغرام مفتيهو
لو جار على في قتلى كيف يفتيهو
يا قلبي الحزين إنت الصبر خاتيهو
إن جار أو عدل سيبهو اليتيه في تيهو
..