السر دوليب... لو قدرت تغيب-

السر دوليب..

لو قدرت تغيب-

لو قدرت تغيب عليا..
وابقي بي وصلك ضنين
ياحياتي.. ونور عينيا..
وين تروح من حبي وين؟؟

النسيم الماري هادي..
فيهو من اشواقي نفحة
والقمر النورو بادي..
فيهو من ضي حبي لمحة
لو غبت صديت ياحنون..
وبعدت تابعت الظنون
للقلوب احساس يقرب..
حتي للارواح عيون

كل زهور زيك عبيرا..
فايحة بالشوق.. والهيام
كل عطور انت بتريدا..
شايلة ليك مني السلام
وانا راجيك بالاماني..
بكل اشواقي.. وحناني
لو بعد طيفك عليا..
بطولو بالفن.. والمعاني

شعرك الليل الطويل..
يحكي ليك سهدي في غيابك
وجهك الناير جميل..
نورو زي املي في غيابك
وانا برضاهو السهر..
لو انت حسنك بيه امر
ليلي يستناك تهل..
عليا يا اجمل قمر ..