هثمان خالد .. الي فاتنة

الشاعر عثمان خالد
الي فاتنة

انا في هواه
الشوق معاي قرَب يجن
وحياته مما حسنه بان
انا فيه سرحان لي زمن
* * *
سرحان في ليل
ناعم طويل
في كتيفه بي رقه انهدل
شايفه اتكى
ولامس وسادات الحرير
لامن بكى
ورمَى العطور
دمعات ونور من الخصل
ما ليل سجى !
ماليل ووسط الليل قمر
لكنه ما كل يوم بهل
مع انه في هالته اكتمل
لي شوفته عطشانات عيون
للبسمه لامن احلى نون
تبدو وتبين من تحت المقل
لي شوفته كم دغدني شوق
فارد جناح زارعني فوق
زارعني في نجماً بعيد
وحياتي مالي فيه ايد
مستني بس لو يوم اضوق
الريده في بسمة شروق
تملاني بي دفقات امل
* * *
سرحان زمن في زول جميل
ريًح رويحتي وعذبه
ماليني بي اجمل شعور
سما بي عواطفي وهذبه
في طبعه ما أحلى الغرور
وكتين يتيه زي الظبا
ما روعه عاد . . !
ما روعه .. ما سبحة جمال
عذّب عيون
عذّب خيال
نغّم حياتي وحببه
ما نضره بتروي القلوب
ما فتنه اصبا من الصبا
ما سر بيتعب نور عيون
مشدوده نحوه وجاذبا
ما كون جمال
هيبه وجلال
فات في العصور ملكة سبا
* * *
سرحان زمن والزاد سهر
والدمعه لما الشوق يزيد
تترامى زي دمع المطر
وانا من سنين
في هواه عايش بالأمل
سلواي .. أمل
رجاي .. أمل
وعزاي .. أمل
وغناي .. أمل
ومناي .. أمل
حتى العمر يا أخوانا مرهون بي أمل
ما حبي صار آمال تعاش
يا أخوانا صار مضرب مثل
قبالي قيس لو قالو جنّ
وعاش أمل لما انذهل
ما حالتي يا حبان بشوفه
الليلة عن قيس ما بتقل
ما شايف حسنه كل !
وقليبي يقسم . بالحنان
بي نار حنانه المشتعل
بالآهة .. آه من آهتي
لما الليل يطل
لامن خيالي يشيلني شيل
ويسيبني قدام المقل
ما برتحل !
ما برتحل في كون عيون
نظراته سال سيوفه سل !
مين ضاق معاي طعم السيوف
مين قبلي في عيون ارتحل ؟
مين شاف في لحظه نهار وليل
مين شاف شمس بجوار زحل
مين كان بموت منّ العيون
وف لحظه تحبيه المقل
وانا ممتثل
فرحان قليبي ملان حنان
بالنشوه ما سكران ثمل !
ما اصلي تايه في عيون
وسنانه (( حيران )) منذهل
* * *
سرحان زمن لا قلبي تاب
من حبه يوم لا لقى
غير طيفه في رحلة خيال
رعش قلوبنا وحرقا
ساب في العيون رفة حنين
لي شوفته ياما شوقا
لو يوم بتغريدة عيون
حياني او جاد بي لقا

كان قلبي بي خفقات حنان
ودع همومه وفارقه
وكان روحي ضاقت يوم حناته
أريته كان يوم ضوقا
* * *
سرحان زمن بين النجوم
في ليل وياما الليل يطول
مستني لفظة حب جميله
مع الوتر تدهش عقول
أو حرف في ثغر الزمان
كان في رجاي مستني حول
أو حتى هاتف في الظلام
يهمس معاي بي احلى قول
مستني أوصل حد خيالي
واحيا في لحظات ذهول
كان أقدر أهمس عن جماله
بنغمه تب ما قاله زول
* * *
سرحان زمن يا قلبي ذوب
في ريدتي ليه واوصفه
املاني بنهور الحنين
اسقي النجوم شان يعرفه
انصاف جميل
لي زول جميل
لي رقه ياما الطفا
وهات يا خيال أأنق حروف
في حسنه عاد ما تقول كفى
وزيد يا قلب خفقات حنان
ردد حروفه ولاطفا
وان كانت الخفقات تقول
غير اسمه عندك وقفه
وموت يا قليبي عشان اكون
فنان رقيق مات بالوفا