عثمان خالد .. قلبك حجر

قلبك حجر

عثمان خالد

أقول شعر ؟
ماقلته يا منبع غنايا ولحني لما الليل سكر
دوخت بيك الليل معاي . بالحرقه بكيت القمر
وتعبت معاي كل الحروف واتنهدت كل الصور
والقلبه فيك .. شاهد الله .. بيقطع قلوب الليل وبيبكي الوتر
ولو ما بتحن
مالك مضوق قلبي في دنياك مر
يا بهجه .. يالهفه مشاعر الناس .. ويا فرح العمر
* * *
قبال اشوفك كنت شوق من شوقه غرقان في بحر
ديمه بيهاتي بكف ضراعه ولهفه ساعات السحر
دنياه ليل لامن لقاك يا نور حياته المنتظر
ولقاك صباح كحّل عيونه وصرت في الليلات بدر
فيك انزرع آمال تعانق النجمه وتصافح القمر
واصبح يشيل من الغيوم والشمس ويلون صور
من روحه طرز ليك قلايد شوقه بي انفاس زهر
من دمه كان يروي السطور .. ياحلوه .. يكتب فيك شعر
* * *
يا أحلى من كل الحروف .. يا أغلى حتى من النظر
يا شوق موقد لي جبين اشواقي بي أندر درر
مالك قسيت خليتني بين أمرين أحلاها مر
لا قلبي بقدر يوم يفارقك اريته كان في يوم قدر
ذوبته حب .. عذبته شوق .. خليته عايش في خدر
والليلة جيت تشعل مواقد بعده بي نار تستعر
خليته حاضن الليل عذاب آماله في كف القدر
* * *
مالك قسيت وانت الحنان والرقه والوجه النضر
وانت العليك غنينا دوخنا الشموس بالحرقه بكينا القمر
خليتني بعدك زي يتيم بي يتمه مافي قليب شعر
سارح ابث الليل شكاتي واحكي لعيون القمر
وحالي العلي ما بسر حبيب لو شفته كان دمعك طفر
ولو شفته كان حنيت علي .. يا قاسي .. لو قلبك حجر