عثمان خالد .. محاسن

محاسن
الشاعر عثمان خالد
::::::::::
خلينا بس نسرح
نغازلك بخيالنا
وفيك نتوه
اصلو الجمال لامن
يفوت الحد
حروف .. ما بوصفوه
* * *
كل البنات بيغيروا
من حسنك
يقضوا الليل عذاب
يتأملوه
يتمنو لو كانو ف جمالك
مره بس لو في الخيال
ويتوهو في سرحات غيوره
في سر عيونك .. في الجمال
الكان بدايه
وكان نهايه
وهما .. ما .. ما بوصلوه
اصلو الجمال لامن يفوت الحد
بيغيروا ويحسدوه !
* * *
ونحنا في هواك يا غالي
بنشيل العيون مرفأ سعاده
بنستريح قدامه .. نتخدر
نعانق العود دموع فرحه
وانامل راعشه
في غيبوبه بتداعب نغم
نظرتنا ليك تصبح عباده
وامنياتنا خيوط فرح
تمتّد تحضن للغيوم
ترحل تطرّز لينا عش
بين النجوم
ونغني ليكا .. نعيش خيال
يغمرنا بيكا .. ونرتعش
وتتوه حروف يا غالي
والانغام تتوه
اصلو الجمال لامن يفوت الحد
حروف !! مابوصفوه
* * *
نرحل معاكا
ونفرش الاهداب طريق
الطيب يقودنا
وامنياتنا المتكى
والغيم وساده
والاغنيات
اصداء بعيده بتقترب
تجينا في همسات نديه
تدغدغ الليل بالطرب
بالدندنات
ونحنا في لحظات وسن
كم مر بينا غمام وفات
فرحان بيرقص .. مبتسم
نبهنا لما رمى الظلال
وفي رقه وفي حنيه
قال
اجمل كلام واصدق موده
ولمتين معاك
نسرح نغازلك بي خيالنا
وفيك نتوه ؟