عثمان خالد .. بتقولي لا

بتقولي لا .. ؟
الشاعر الأستاذ / عثمان خالد
غناء الفنان عبد العزيز المبارك
:::::::::::::::::::::::::::::
بتقولي لا ؟
لقليب عليك يقطر حنان ويذوب وله !
بتقولي لا ؟
لقليب رهيف ماظنه .. لا .. لا .. بيحمله !
بتقولي لا ؟
يا بهجه .. يا ملاّلة.. يا ست القلوب .. يا مذهلة
* * *
بتقولي لا ؟
كيفن قليبي الشال هواك أبحر رضاك مايوصله !
كيفن عيوني الراحله في عينيك وبيك متهلله
تحمل تفارق وجنتين غرقانه طيب ومبلله
* * *
بتقولي لا ؟
وحياة شبابك ذبت في عينيك حنان ومغازله
سافرت في رحلة مشاعر ملهمه ومتأمله
وشفت الورد من وجنتيك غيرانه جات متوسله
وحتى القمر غار من صفاك اصبح يردد في الصلاه
وجاك المسا يأدي الفروض داعب شفايفك غازله
شال لون جميل من وجنتيك مسح خدوده وبلله
واصبح يلملم في النجوم ينظم عقوده ويغزله
طرز لجيدك بالنجوم باقات انيقه مظلله
ونزل القمر بالفرحه جاك يا حلوه شاله وقبله
واهداها ليك .. يا حلوه .. لو قلبك يوالف ويقبله !
* * *
بتقولي لا ؟
ونا فيك بدغدغ في القلوب ياحلوه أحرف واشتله
أملاها رقه ودندنات وعناق حنان ومغازله
ونا بيكي .. لو قلبك يحن ..عالم يجم من الوله
أسقيك حنان . ما ظنه كان . في الدنيا أو كانت صله
وحكيك لحون .. يا بهجه لا انسابت ولا عود غازله
وازرع هواك بين النجوم روضة حنان وادلله
وأخلي كل الكون يقول : فنان بذوب في مذهله
بتقولي لا .. ؟
يا لهفة المشتاق ويا طعم الحلا ؟
بتقولي لا .. ؟
يا بهجه .. يا ملاله .. يا ست القلوب .. يا مذهله